Священноисповедник Николай (Могилевский), митрополит Алма-Атинский (1955)

Житие священноисповедника Николая (Могилевского), митрополита Алма-Атинского

Акафист священноисповеднику Николаю (Могилевскому), митрополиту Алма-Атинскому 

Тропарь святому священноисповеднику Николаю (Могилевскому)

глас 7 
Яко светозарное светило, / лучами Божественных дарований сияющее, / яви тя Солнце Правды Христос Бог наш, / тьму безбожия и злонравия далече отгоняюща, / и зарями богопознания осияюща вопиющих верно: / Радуйся, святе Николае, / Христов исповедниче и Казахстанский чудотворче. 

Кондак святому священноисповеднику Николаю

глас 8
Избранный от Предвечнаго Архиерея и Церкви Зиждителя, / данный Казахстану ходатаю изрядный и заступниче пречудный, святителю Николае, / ублажая подвиги и труды твоя, / любве ради Господа тобою подъятыя, / восхваляем дивнаго во святых Своих Бога нашего, / давшаго тебе благодать величия Своего / и научившаго нас любовию пети тебе: / Радуйся, святе Николае, / Христов исповедниче и Казахстанский чудотворче. 

Величание святому священноисповеднику Николаю (Могилевскому) 

Величаем тя, Христов исповедниче, святителю Николае, и чтим болезни и труды твоя, имиже трудился еси во благовестии Христове. 

Молитва святому священноисповеднику Николаю (Могилевскому) 

О предивный Человеколюбца Господа и Спаса нашего Сладчайшаго Христа Иисуса подражателю и стада словесных овец, от Него попечению твоему врученнаго, добрый пастырю! Ты в житии твоем многоразличныя козни лукавых человек и духов тьмы испытал еси и благодатию Божиею, от матерних пелен тобою усердно в чистоте хранимою, явно тех победил еси. И нас, в добродетели убогих, сетей бесовских избави, да всегда во всем житии нашем делом, словом, умом и помыслы сердец наших, верно и непорочно послужим Единому Своему Владыце и Богу, яко и обещалися есмы при купели своего крещения Тому благоугождати. Ты паче всех земных благ Сладчайшаго Господа возлюбил еси и Тому чрез все житие добре последовал еси, угодникам Его всеусердно подражая, Божественными учении и благодатию не свою токмо душу питающи, но и множество людей от тьмы неверия и лжеименнаго разума к Несозданному свету Единосущныя Троицы привел еси. Сия добре ведуще, молим тя, испроси у Христа Бога благодать просвещающую и освещающую нас, да ею осеняеми, в вере и благочестии, в подвизех любве и самоотвержения поживем и неленостно потщимся служити ближним в их нуждах и обстояниях, да предстательством твоим сподобимся непреткновенно кратковременное странствие жития нашего совершити и в мире и покаянии града вечныя радости Иерусалима Небеснаго достигнути и тамо, с тобою и всеми святыми, непрестанно воспевати Троицу Нераздельную, Едино Божество, Отца и Сына и Духа Всесвятаго, во веки веков. Аминь.